GYMNASTES

GYMNASTES

minister erat Gymnasiorum apud Vett. post Gymnasiarcham ac Xystarchem, praecipuus: qui, quemadmodum Gymnasiarchaloci princeps, Xystarchus Athletarum Magister; ita is omnibus exercitiis praefectus erat, non ignobilis, ut qui eorum facultates pro sanitate, modum et tempus utendi aliaqui dignosceret, haberetque sub se ministros reliquos inferiores, Paedotribam, exercitationis luctae Praefectum, Sphaeristicum, Fricatorem, Reunctorem ac Mediastinos, Pilicrepos, Alicrepos, Ianitores ac Fornacatores. Eum omnium exercitationum Magistrum exstitisse, et Medico in multis parem, ut qui exacte calleret, quas a quibusvis exercitationes, quo modo, quamdiu obiri conveniret, tradit Galen. de tuenda valetud l. 2. c. 2. Unde Plato de LL. l. 11. quis servum aegrum Medico aut Gymnastae vendat, non esse redhibendum vult, quasi uterque languentes a sanis dignoscere scire debeat. Imo Basil. Hexaem. Hom. 11. de hominis natura aeque Gymnasten ac Medicum speculari et quaerere consuevisse docet. Xenoph. Progymnasten appellavit: Α᾿λείπτην Arist. Ethic l. 2. c. 6. et Celsus, ubi dixit, Sanum hominem nullis sese legibus obligare debere, neque Medico, neque Alipta egere: per Aliptam hîc non alium quam Gymnastam intelligens. Vide quoque Cic. Ep. 9. ad Lentul. plato cum eodem Paedotribam confundit: Galen. vero eos valde diversos fuisse docet; dum Gymnastam Medico et Imp. Paedotribam militi et coquo assimilat merumque nominat Gymnastae ministrum. Sicut enim miles nihil eorum, quae ad belicam scientiam pertinent; et coquus eorum, quae ad Medicinam, novir, sed alter Imp. alter Medici duntaxat, mandata exsequitur: pariter Paedotriba, exercitationum facultatem ipse ignorans, Gymnastae solum iussa exsequebatur, nisi quod et usum et differentias et modum exercitationum experientiâ quadam calleret, interim ob ignorantiam toties aberraret, ut Galen. de Puero Epil. scribat, difficile fuisse prudentem paedotribam invenire. Quam differentiam Arist. quoque cognovisse videtur, cum Politic. l. 8. concludit, adolescentes Gymnasticae, atque Paedotribicae, tradendos esse: quarum altera qualem quendam faciat corporis habitum, altera operationes. Et Polit. l. 4. c. 3. Μηδὲν, ait, ἧττον τȏυ παιδοτρίβου και τȏυ γυμναςτικοῦ πρασκευάσαι τε καὶ ταύτην ἐςτὶ τὴ δυν´αμιν. Ita Gymnastes Praefectus erat exercitationum; Paedotriba minister, et panifici, coquo ac aedificatori quodammodo respondens, facere panes, obsonia, aedes, scientibus quidem, minime tamen, quid in ipsis sit optimum, quid non optimum, intelligentibus et quam facultatem ipsorum unumquodque ad sanitatem habeat, dignoscentibus. Quod vero neutrum horum nominum apud Homer. exstet, ratio est, quia semina duntaxat Gymnasticae attis, tum temporis apparebant, neque adhuc ars in regulas et formam redacta, adeoque nec Artifex, nec Minister tum erant. Hier. Mercurial. de Arte Gymn. l. 1. c. 12. ubi de Gymnasiorum Ministris. In Olympicis seu Gymnicis Ludis, Gymnastes diu praeexercitatum Athletam, ad sacrum deducebat, et postquam a Praecone victor eset renuntiatus, eadem ratione inde reducebat, uti pluribus docet Car. Paschal. Coron. l. 7. c. 10. et 11.